ياخلف راع الجزيله ليا هبت هبوب

لو تقول ان القصايد تقفاها الغروب
ماتوخر دون وجهي لها طب وطبيب

الحميه والعناوين والهاجس طروب
والرجال اللي تقدم على موقف مهيب

ياتجاه البوصله وين تصحيح الدروب
امدح اللي دون ربعه وقف شاعر واديب

اشعلوها والجزايل لها عندي شبوب
والكلام بدون برهان للرجال عيب

ان بغيتوها شمالي لكم لين الجنوب
من ديار الجوف حايل ليا وادي طريب

ياخلف راع الجزيله ليا هبت هبوب
لانخاك الوايلي قلت ياعونك قريب

اشهد انك بالحميه مقدر ومحسوب
يوم كلن صد عنها ولا توحي دبيب

ياسلايل درع وايل ملطمة الشعوب
في نهار مانساه الصبي والراس شيب

ياصقور العز ربعي ولافينا مغلوب
يوم ولد اللاش ضايع لنا نار ولهيب

يالسفير الوايلي بالنوايا والقلوب
ياحزام المرجله منت بالوقفه غريب

لاكتبت الشعر ماني بجاهل ومغصوب
ان مدحت عيال عمي واذا صديت ذيب

الشاعر عبدالله سعود الحوشاني العنزي

الاستاذ خلف بن بخيت العنزي